🎯 सणासुदीत भेसळयुक्त पदार्थांपासून सावधान – लोककल्याण ग्राहक संरक्षण संस्थेचे आवाहन ♦️भेसळ आढळल्यास त्वरित प्रशासनाशी संपर्क साधावा – उपाध्यक्ष रमेश म्हात्रे

लोकदर्शन उरण👉विठ्ठल ममताबादे

उरण दि. ३ (विठ्ठल ममताबादे) :
सणासुदीच्या दिवसात मिठाई, पेढे व दुग्धजन्य पदार्थांच्या विक्रीत मोठी वाढ होत असल्याने भेसळयुक्त पदार्थांचा प्रश्न ऐरणीवर आला आहे. ग्राहकांचे आरोग्य धोक्यात येऊ नये, यासाठी व्यापाऱ्यांनी सुरक्षिततेची काळजी घ्यावी व भेसळमुक्त मिठाई विक्रीस ठेवावी, असे आवाहन लोककल्याण ग्राहक संरक्षण संस्थेच्या महाराष्ट्र राज्याचे उपाध्यक्ष रमेश म्हात्रे यांनी केले आहे.

🚨 भेसळयुक्त पदार्थांचे दुष्परिणाम

दुधामध्ये पाणी, डिटर्जंट, युरिया, फॉर्मल्डिहाइड, मेलामाइन यांसारखे रासायनिक पदार्थ तर मिठाईमध्ये कृत्रिम रंग, खवा, तांदळाचे पीठ, तसेच ऍल्युमिनियम फॉइल मिसळले जात असल्याचे अनेकदा आढळून आले आहे. हे पदार्थ आरोग्यासाठी घातक ठरून मळमळ, यकृताचे आजार, मूत्रपिंडाच्या समस्या व गॅस्ट्रोएन्टेरायटिससारखे गंभीर आजार निर्माण करू शकतात.

🛑 ग्राहकांना आवाहन

ग्राहकांनी मिठाई खरेदी करताना ती जास्त रंगीत, हाताला रंग लागणारी किंवा चिकटपणा जाणवणारी असल्यास टाळावी. उरण तालुक्यातील १५० हून अधिक मिठाई दुकाने लक्षात घेता ग्राहकांनी पारख करूनच खरेदी करणे आवश्यक आहे.

📞 तक्रार कुठे करावी?

भेसळयुक्त पदार्थ आढळल्यास लोककल्याण ग्राहक संरक्षण संस्थेचे पदाधिकारी किंवा प्रशासनाशी त्वरित संपर्क साधावा, असे आवाहनही करण्यात आले आहे.

🗨️

“मिठाईतील, माव्यातील व दुधातील भेसळ हा गंभीर प्रश्न आहे. ग्राहकांनी सतर्क राहावे. भेसळ आढळल्यास संस्थेला किंवा प्रशासनाला कळवावे. मिठाई विक्रेत्यांनी ताजी व गुणवत्तापूर्ण मिठाई विक्रीस ठेवावी, हेच आमचे आवाहन आहे.”
— रमेश म्हात्रे, उपाध्यक्ष महाराष्ट्र राज्य लोककल्याण ग्राहक संरक्षण संस्था