🌟 समाजप्रबोधनाचा अखंड दीप — ह. भ. प. बापूसाहेब ढगे महाराज यांना ‘युवक आधार समाजरत्न पुरस्कार’ 🌟

लोकदर्शन👉गुरुनाथ तिरपणकर

आष्टी तालुका, पारोडी येथील समाजजागृती, व्यसनमुक्ती आणि भक्तीमार्ग प्रसारासाठी आयुष्य समर्पित करणारे आनंद संप्रदायाचे तेजस्वी प्रवर्तक ह. भ. प. बापूसाहेब ढगे महाराज यांना यंदाचा दैनिक युवक आधार समाजरत्न पुरस्कार जाहीर झाला आहे. त्यांच्या कार्याचा गौरव होताच पारोडी व बोरुडीसह संपूर्ण आष्टी तालुक्यात आनंदाचे वातावरण निर्माण झाले आहे.

बापूसाहेब ढगे महाराज यांना परम पूजनीय बंडू बाबा महाराज, तसेच परम पूजनीय नाना महाराज वाघमारे यांचे आशीर्वाद लाभले असून, वयाच्या केवळ २५व्या वर्षी त्यांनी आनंद संप्रदायाचा अनुग्रह स्वीकारला. त्या दिवसापासून त्यांनी व्यसनमुक्त समाजनिर्मिती, भक्तीमार्गाचा प्रसार आणि समाजप्रबोधन यासाठी आयुष्य वाहून घेतले आहे.

महाराजांनी कीर्तन आणि प्रवचनांद्वारे शेकडो गावे पालथी घालून हजारो तरुणांना व्यसनमुक्तीचा मार्ग दाखविला. समाजातील दुरावलेले घटक एकत्र आणणे, शांतता, सद्भावना व अध्यात्माची शिकवण देणे हेच त्यांचे ध्येय ठरले.

त्यांच्या कार्यातील एक महत्त्वाचा टप्पा म्हणजे बोरुडी येथे उभारलेले परम पूजनीय बंडू बाबा महाराजांचे मंदिर, जे आज हजारो भाविकांचे श्रद्धास्थान बनले आहे. तसेच पारोडी येथे ते सलग बारा वर्षे आनंद संप्रदायाचा वैष्णव मेळावा आयोजित करीत आहेत, ज्यामुळे आष्टी तालुक्यात अध्यात्मिक आणि सामाजिक वातावरण अधिक बहरत आहे.

या सातत्यपूर्ण समाजकार्यासाठी त्यांना दैनिक युवक आधार समाजरत्न पुरस्कार जाहीर झाला असून, हा पुरस्कार ७ सप्टेंबर रोजी, न्यू पनवेल (सेक्टर ७) शबरी हॉल येथे प्रदान करण्यात येणार आहे. हा पुरस्कार IBN-18 लोकमतचे सहसंपादक मा. श्री. विलास बडे आणि स्टार प्रवाहवरील प्रसिद्ध अभिनेत्री माधवी जुवेकर यांच्या हस्ते प्रदान करण्यात येईल, अशी माहिती संपादक संतोष आमले यांनी दिली आहे.

या सन्मानामुळे आनंद संप्रदायातील सर्व भाविकांमध्ये अभिमानाची भावना निर्माण झाली असून, बापूसाहेब ढगे महाराज यांचे कार्य संपूर्ण समाजासाठी प्रेरणादायी ठरत आहे.