🎓 डॉ. सुनील भोकरे यांच्या वतीने शिष्यवृत्तीधारक विद्यार्थिनींना गौरव

लोकदर्शन वालुर👉महादेव गिरी

वालुरचे भूमिपुत्र व मुख्यमंत्री कार्यालयात सचिव पदावर कार्यरत असलेले डॉ. सुनील भोकरे हे गेल्या अनेक वर्षांपासून विद्यार्थ्यांना शैक्षणिक प्रोत्साहन देण्यासाठी पुढाकार घेत आहेत. त्यांच्या वतीने दरवर्षी जि. प. कन्या शाळेतील एन.एम.एम.एस. स्कॉलरशिप व पूर्व माध्यमिक शिष्यवृत्ती धारक विद्यार्थिनींना रोख पारितोषिक देऊन सन्मानित केले जाते.

याही वर्षी १५ ऑगस्टच्या औचित्याने शाळेतील शिष्यवृत्तीधारक मुलींना पारितोषिक वितरण करण्यात आले. या कार्यक्रमात मुख्याध्यापक षडानन देशमाने यांच्या हस्ते विद्यार्थिनींना रोख रक्कम देण्यात आली.

अक्षरा दत्ता भोगांवकर हिने प्रथम क्रमांक मिळवून ₹३,००० रोख पारितोषिक प्राप्त केले.

वैष्णवी भिवाजी आष्टकर व भाग्यश्री बालासाहेब सारुक या विद्यार्थिनींना प्रत्येकी ₹१,००० चे रोख पारितोषिक देऊन गौरविण्यात आले.

तसेच वालुरचेच भूमिपुत्र व भारतीय डाक विभाग, संभाजीनगर येथे कार्यरत रामभाऊ पाथरकर यांच्या वतीनेही विविध स्पर्धा परीक्षेत यश मिळवलेल्या विद्यार्थ्यांना बक्षीस वितरण करण्यात आले.

या प्रसंगी शाळा व्यवस्थापन समितीच्या अध्यक्षा पोर्णिमा वाघमारे, उपाध्यक्षा संध्या नामदेव आष्टकर यांच्यासह मान्यवर उपस्थित होते.

या उपक्रमामुळे विद्यार्थ्यांमध्ये स्पर्धात्मकतेबरोबरच शिक्षणाबद्दलची प्रेरणा वाढत असल्याची भावना व्यक्त करण्यात आली.