लोकदर्शन उरण👉 विठ्ठल ममताबादे
उरण, दि. 13 (विठ्ठल ममताबादे) – देशातील खासदारांच्या प्रतिष्ठेच्या केंद्रबिंदू असलेल्या दिल्लीतील कॉन्स्टिट्यूशन क्लबच्या 2025 निवडणुकीत मावळ लोकसभा मतदारसंघाचे शिवसेना खासदार श्रीरंग बारणे यांनी मोठ्या मताधिक्याने विजय मिळवला. महाराष्ट्रातून उमेदवारी करणारे ते एकमेव खासदार होते.
कॉन्स्टिट्यूशन क्लब हा लोकसभा व राज्यसभेच्या विद्यमान तसेच माजी खासदारांचा अधिकृत क्लब आहे. लोकसभेचे अध्यक्ष हे त्याचे पदसिद्ध अध्यक्ष असतात. क्लबच्या कार्यकारी मंडळातील सदस्य म्हणून खासदार बारणे आता राष्ट्रीय पातळीवरील महत्त्वाच्या धोरणात्मक निर्णयांमध्ये सक्रिय भूमिका बजावणार आहेत.
या निवडणुकीसाठी 12 ऑगस्ट रोजी मतदान पार पडले. पक्षविरहित असलेल्या या निवडणुकीत केंद्रीय गृहमंत्री अमित शाह, भाजप अध्यक्ष जे. पी. नड्डा, काँग्रेस नेत्या सोनिया गांधी, मल्लिकार्जुन खर्गे, स्मृती इराणी, शत्रुघ्न सिन्हा, कंगना रणौत यांच्यासह एकूण 669 विद्यमान व माजी खासदारांनी मतदानाचा हक्क बजावला. महाराष्ट्रातील खासदारांची उपस्थिती लक्षणीय होती.
विजयानंतर खासदार बारणे म्हणाले,
> “ही निवडणूक पक्षविरहित असते. सर्वपक्षीय खासदारांशी असलेल्या मैत्रीपूर्ण संबंधांमुळेच मला हा सन्मान मिळाला. खासदारांच्या गरजा व अपेक्षा लक्षात घेऊन नव्या उपक्रमांसाठी काम करणार आहे.”
गेल्या अनेक वर्षांपासून क्लबवर भाजप खासदार राजीवप्रताप रुडी यांचे वर्चस्व राहिले आहे. या वेळी सचिवपदासाठीही रुडी यांनी विजय मिळवला. कार्यकारी सदस्य म्हणून श्रीरंग बारणे यांची निवड महाराष्ट्रासाठी अभिमानाची बाब मानली जात आहे.
