🔴 आदिवासी कोलाम बांधवांची आर्थिक फसवणूक करणाऱ्यांवर कठोर कारवाई करा – माजी आमदार संजय धोटे मुख्य आरोपीपर्यंत चौकशी जाऊन कठोर शिक्षा झाली पाहिजे – पीडित व धोटे यांची मागणी

लोकदर्शन👉 मोहन भारती

(गडचांदूर, जुलै ३१) –
जिवती तालुक्यातील मरकागोंदी, चिखली, निजामगोंदी, मारोतीगुडा, धनकदेवी येथील कोलाम समाजातील आदिवासी शेतमजुरांच्या नावावर ग्रामीण बँक गडचांदूर येथून बनावट कागदपत्रांच्या आधारे परस्पर कर्ज उचलून आर्थिक फसवणूक केल्याचा गंभीर प्रकार उघडकीस आला आहे.

या प्रकरणात पीडित आदिवासी बांधवांनी माजी आमदार संजय धोटे यांच्याकडे आपल्या व्यथा मांडताच त्यांनी त्वरीत गडचांदूर व कोरपना पोलीस ठाण्यांत लेखी तक्रार दाखल केली. तसेच जिल्हाधिकाऱ्यांना भेटून संबंधित आरोपींवर कठोर शिक्षा व्हावी, यासाठी निवेदनही सादर केले.

फसवणुकीची रचना कशी झाली?
सन २०२२ मध्ये विनायक राठोड (रा. सारंगापुर, ता. जिवती) आणि त्याच्या सहकाऱ्यांनी, तत्कालीन बँक मॅनेजर हजारे यांच्या संगनमताने, शासनाच्या योजना मिळवून देतो असे सांगून ५० हून अधिक आदिवासींच्या नावाने प्रत्येकी ₹१.५ लाखांचे कर्ज मंजूर करून घेतले. बनावट ७/१२ दाखले तयार करून ही कर्जमंजुरी करण्यात आली. मात्र प्रत्यक्षात पीडितांना केवळ ₹५,००० ते ₹१०,००० रोख स्वरूपात देऊन उर्वरित रक्कम स्वतःच्या खिशात टाकण्यात आली.

प्रकरण उघड कसे झाले?
फसवणुकीची माहिती तेव्हाच उघडकीस आली जेव्हा आठवड्याभरापूर्वी ग्रामीण बँक गडचांदूरने कर्ज वसुलीसाठी नोटीस पाठवायला सुरुवात केली. यानंतर संतप्त आदिवासींनी एकत्र येत माजी आमदार संजयभाऊ धोटे यांना आपली समस्या सांगितली.

प्रशासनाचे दुर्लक्ष?
या गंभीर आर्थिक गैरप्रकारात आरोपी विनायक राठोड व त्याचे सहकारी अद्यापही मोकाट फिरत असून त्यांच्या चौकशीला कोणताही गतीशील सुरुवात झालेली नाही, असा आरोप पीडित व स्थानिकांनी केला आहे. त्यामुळे मुख्य आरोपीपर्यंत चौकशी जाऊन कठोर शिक्षा झाली पाहिजे, अशी मागणी जोर धरू लागली आहे.

या वेळी उपस्थित…
या निवेदनावेळी माजी आमदार संजयभाऊ धोटे यांच्यासमवेत युवा उद्योजक निलेश ताजणे, भाजपा ज्येष्ठ नेते संदीप शेरकी, ज्येष्ठ नेते शिवाजीराव शेलोकर, पत्रकार अनिल कौरासे, कुणाल पारखी, सुयोग कोंगरे, अजिम बेग, शुभम थिपे आणि पिडीत आदिवासी महिला-पुरुष मोठ्या संख्येने उपस्थित होते.

✍️– मोहन भारती
संपादक, लोकदर्शन सकारात्मक लोकजागर