📰 वसंतराव नाईक यांच्या 112व्या जयंतीनिमित्त गडचांदूरमध्ये वृक्षारोपणाचा उपक्रम

✍️ प्रतिनिधी – मोहन भारती, लोकदर्शन न्यूज पोर्टल

गडचांदूर (दि. ३ जुलै) –
सद्गुरु सेवालाल महाराज बंजारा समाज संस्थान, गडचांदूर यांच्या वतीने हरित क्रांतीचे प्रणेते, महाराष्ट्रातील सुप्रसिद्ध शेतकरी नेते आणि माजी मुख्यमंत्री वसंतराव नाईक साहेब यांच्या 112व्या जयंती निमित्त वृक्षारोपणाचा उपक्रम राबवून त्यांच्या स्मृतींना अभिवादन करण्यात आले.

या कार्यक्रमात संस्थेचे पदाधिकारी, कार्यकर्ते आणि समस्त बंजारा समाज बांधव मोठ्या संख्येने सहभागी झाले होते. वसंतराव नाईक यांनी “हरित क्रांती, संपन्न शेती” या विचारांचा प्रसार करून महाराष्ट्राला दुग्धसंपन्न व कृषीसमृद्ध करण्याचे महान कार्य केले. त्यांच्या विचारांनी अनेक शेतकऱ्यांना प्रेरणा मिळाली, याची आठवण उपस्थितांनी भावुकतेने व्यक्त केली.

कार्यक्रमाचे अध्यक्षस्थान सेवानिवृत्त मुख्याध्यापक एम. बी. चव्हाण सर यांनी भूषवले, तर प्रमुख अतिथी म्हणून नामदेव जाधव सर व विनोद चव्हाण सर उपस्थित होते. कार्यक्रमाचे संचालन संस्थेचे सदस्य दिलीपकुमार राठोड सर यांनी केले.

या दिवशीच संस्थेचे कोषाध्यक्ष कनिरामजी पवार सर यांचा वाढदिवस देखील उत्साहात साजरा करण्यात आला. या निमित्ताने उपस्थित बांधवांना अल्पोपहार व चहा देण्यात आले.

कार्यक्रमाच्या यशस्वीतेसाठी संस्थेचे अध्यक्ष श्री हितेश चव्हाण, उपाध्यक्ष रामचंद्र पवार, सचिव उत्तम जाधव, सहसचिव अशोक जाधव, कोषाध्यक्ष कनिरामजी पवार, तसेच उल्हास पवार, शंकर राठोड सर, दिलीप राठोड सर, श्री शिवाजी राठोड सर आदींनी विशेष मेहनत घेतली.

कार्यक्रमाच्या शेवटी शंकर राठोड सर यांनी आपल्या वतीने वृक्षदान करून पर्यावरण संवर्धनाचा संदेश दिला.

हा कार्यक्रम प्रेरणादायी ठरला असून समाजामध्ये हरित जाणीव निर्माण करणारा उपक्रम म्हणून अनेकांच्या कौतुकास पात्र ठरला आहे.

—