🗞️ कोरपना-जिवती ‘अ’ गटातून काँग्रेसचेच दोन उमेदवार; सुभाष धोटे यांच्या पुढे ‘बंधू की कार्यकर्ता?’ असा पेच!

लोकदर्शन गडचांदूर👉 (अशोककुमार भगत)

चंद्रपूर जिल्हा मध्यवर्ती सहकारी बँकेच्या निवडणुकीत कोरपना-जिवती ‘अ’ गटात काँग्रेसचेच दोन उमेदवार रिंगणात उतरल्याने प्रचंड राजकीय रंगत पाहायला मिळत आहे. एकाच पक्षाचे दोन उमेदवार समोरासमोर आल्याने स्थानिक पातळीवर संभ्रमाचे वातावरण तयार झाले असून, माजी आमदार सुभाष धोटे यांच्या भूमिकेकडे संपूर्ण जिल्ह्याचे लक्ष लागून आहे.

या गटातून सुभाष धोटे यांचे बंधू आणि बँकेचे माजी अध्यक्ष शेखर धोटे (राजुरा) आणि कोरपना तालुक्याचे निष्ठावान काँग्रेस कार्यकर्ते व विद्यमान संचालक विजयराव बावणे यांचे उमेदवारी अर्ज वैध ठरले आहेत. त्यामुळेच काँग्रेस गटात ‘बंधूला साथ की कार्यकर्त्याला पाठिंबा?’ असा पेच निर्माण झाला आहे.

यावेळी कोरपना-जिवती या संमिश्र गटातून पहिल्यांदाच एकच संचालक निवडला जाणार आहे. त्यामुळे एकीकडे पक्षनिष्ठ कार्यकर्त्यांना प्राधान्य द्यायचे की कौटुंबिक नात्याला? या दुहेरी कात्रीत काँग्रेसचे वरिष्ठ नेतृत्व अडकले आहे. स्थानिक स्वराज्य संस्थांच्या आगामी निवडणुकांच्या पार्श्वभूमीवर “ग्रासरूटवर” काम करणाऱ्या विजय बावणे यांना नाराज करणे पक्षासाठी घातक ठरू शकते, असा सूर कार्यकर्त्यांमध्ये आहे.

या निवडणुकीने केवळ पदासाठी नाही तर निष्ठा आणि नात्यांची कसोटी लावली असून, काँग्रेस गटातील अंतर्गत असंतोष उफाळण्याची चिन्हे दिसत आहेत. दोघेही लोकप्रिय, जनतेशी प्रत्यक्ष संपर्कात आणि प्रभावशाली असल्याने ही लढत अधिक चुरशीची ठरणार आहे.

आता माजी आमदार सुभाष धोटे काय भूमिका घेतात, कुणाच्या पाठीशी उभे राहतात आणि या अंतर्गत संघर्षातून काँग्रेस कोणती दिशा घेते, याकडे सर्वांचे लक्ष लागून आहे.

🖊️ लोकदर्शन न्यूज पोर्टलसाठी विशेष वार्तांकन
अशोककुमार भगत