🌟 गोंडवाना विद्यापीठ परिक्षेत्रात मुक्त व दूरस्थ शिक्षण केंद्रांना परवानगी देऊ नये – यंग टीचर्स असोसिएशनची मागणी 🌟

लोकदर्शन न्यूज 👉 मोहन भारती

गोंडवाना विद्यापीठाच्या परिक्षेत्रात इतर मुक्त विद्यापीठे, दूरस्थ शिक्षण संस्था व अभ्यास केंद्रे सुरू करण्यास परवानगी देऊ नये, अशी ठाम मागणी गोंडवाना यंग टीचर्स असोसिएशनच्या वतीने कुलगुरू डॉ. प्रशांत बोकारे यांच्याकडे करण्यात आली आहे. या मागणीचे निवेदन संघटनेचे अध्यक्ष डॉ. संजय गोरे व सचिव डॉ. विवेक गोर्लावार यांनी सादर केले.

विद्यापीठ व संलग्नित महाविद्यालयांत पदवी व पदव्युत्तर शिक्षण घेणाऱ्या विद्यार्थ्यांची संख्या गेल्या काही वर्षांत झपाट्याने घटली असून, विद्यापीठाच्या विविध नियामक मंडळांमध्ये ही बाब चिंतेचा विषय ठरली आहे. मागील वर्षाच्या तुलनेत विद्यार्थी संख्या तब्बल २० हजारांनी घटल्याची धक्कादायक माहिती समोर आली असून, त्यामुळे अनेक महाविद्यालयांतील शैक्षणिक तुकड्या बंद होण्याच्या मार्गावर आहेत आणि शिक्षक अतिरिक्त ठरू लागले आहेत.

परिक्षेत्रात कार्यरत असलेल्या इतर विद्यापीठांच्या अभ्यास केंद्रांमुळे – जसे की यशवंतराव चव्हाण महाराष्ट्र मुक्त विद्यापीठ, कवी कालिदास संस्कृत विद्यापीठ, इंदिरा गांधी हिंदी व मुक्त विद्यापीठ इत्यादी – स्थानिक विद्यार्थ्यांचा ओघ गोंडवाना विद्यापीठाकडे कमी होत आहे. ही स्थिती अत्यंत गंभीर असून, भविष्यात अनेक महाविद्यालये विद्यार्थ्यांच्या अभावामुळे बंद होण्याची शक्यता नाकारता येत नाही.

अशाच पद्धतीने संत गाडगेबाबा अमरावती विद्यापीठाने आपल्या अधिसभेत जिल्हाबंदीचा निर्णय घेतला असून, त्यांच्या परिक्षेत्रात इतर विद्यापीठांचे अभ्यास केंद्र सुरू करण्यासाठी विद्यापीठाची परवानगी आवश्यक असल्याचा ठराव केला आहे.

या पार्श्वभूमीवर गोंडवाना यंग टीचर्स असोसिएशनने विद्यापीठ प्रशासनाला सूचित केले आहे की, गोंडवाना विद्यापीठाच्या परिक्षेत्रात कोणतीही मुक्त किंवा दूरस्थ शिक्षण केंद्र सुरू करण्यापूर्वी विद्यापीठाची पूर्वपरवानगी घेणे बंधनकारक असावे, यासाठी धोरणात्मक निर्णय घेण्यात यावा.

📌 विद्यार्थ्यांचे हित, शिक्षकांचे भवितव्य व गोंडवाना विद्यापीठाची शैक्षणिक प्रतिष्ठा यांचे रक्षण करण्यासाठी तातडीने प्रभावी धोरण ठरविणे अत्यावश्यक आहे, असे यंग टीचर्स असोसिएशनने स्पष्ट केले आहे.